Chapter 22

[English text for this chapter is available]

maitreya uvāca |
evaṃ āviṣkṛtāśeṣa guṇakarmodayo munim |
savrīḍa iva taṃ samrāḍ upāratamuvāca ha || 1 ||
[Analyze grammar]

manuruvāca |
brahmāsṛjatsvamukhato yuṣmān ātmaparīpsayā |
chandomayastapovidyā yogayuktānalampaṭān || 2 ||
[Analyze grammar]

tattrāṇāyāsṛjat cāsmān doḥ sahasrātsahasrapāt |
hṛdayaṃ tasya hi brahma kṣatramaṅgaṃ pracakṣate || 3 ||
[Analyze grammar]

ato hyanyonyamātmānaṃ brahma kṣatraṃ ca rakṣataḥ |
rakṣati smāvyayo devaḥ sa yaḥ sadasadātmakaḥ || 4 ||
[Analyze grammar]

tava sandarśanādeva cchinnā me sarvasaṃśayāḥ |
yatsvayaṃ bhagavān prītyā dharmamāha rirakṣiṣoḥ || 5 ||
[Analyze grammar]

diṣṭyā me bhagavān dṛṣṭo durdarśo yo'kṛtātmanām |
diṣṭyā pādarajaḥ spṛṣṭaṃ śīrṣṇā me bhavataḥ śivam || 6 ||
[Analyze grammar]

diṣṭyā tvayānuśiṣṭo'haṃ kṛtaścānugraho mahān |
apāvṛtaiḥ karṇarandhraiḥ juṣṭā diṣṭyośatīrgiraḥ || 7 ||
[Analyze grammar]

sa bhavān duhitṛsneha parikliṣṭātmano mama |
śrotumarhasi dīnasya śrāvitaṃ kṛpayā mune || 8 ||
[Analyze grammar]

priyavratottānapadoḥ svaseyaṃ duhitā mama |
anvicchati patiṃ yuktaṃ vayaḥśīlaguṇādibhiḥ || 9 ||
[Analyze grammar]

yadā tu bhavataḥ śīla śrutarūpavayoguṇān |
aśṛṇot nāradād eṣā tvayyāsīt kṛtaniścayā || 10 ||
[Analyze grammar]

tatpratīccha dvijāgryemāṃ śraddhayopahṛtāṃ mayā |
sarvātmanānurūpāṃ te gṛhamedhiṣu karmasu || 11 ||
[Analyze grammar]

udyatasya hi kāmasya prativādo na śasyate |
api nirmuktasaṅgasya kāmaraktasya kiṃ punaḥ || 12 ||
[Analyze grammar]

ya udyatamanādṛtya kīnāśaṃ abhiyācate |
kṣīyate tadyaśaḥ sphītaṃ mānaścāvajñayā hataḥ || 13 ||
[Analyze grammar]

ahaṃ tvāśrṛṇavaṃ vidvan vivāhārthaṃ samudyatam |
atastvaṃ upakurvāṇaḥ prattāṃ pratigṛhāṇa me || 14 ||
[Analyze grammar]

ṛṣiruvāca |
bāḍhamudvoḍhukāmo'haṃ aprattā ca tavātmajā |
āvayoḥ anurūpo'sau ādyo vaivāhiko vidhiḥ || 15 ||
[Analyze grammar]

kāmaḥ sa bhūyān naradeva te'syāḥ |
putryāḥ samāmnāyavidhau pratītaḥ |
ka eva te tanayāṃ nādriyeta |
svayaiva kāntyā kṣipatīmiva śriyam || 16 ||
[Analyze grammar]

yāṃ harmyapṛṣṭhe kvaṇadaṅghriśobhāṃ |
vikrīḍatīṃ kandukavihvalākṣīm |
viśvāvasurnyapatat svāt vimānāt |
vilokya sammohavimūḍhacetāḥ || 17 ||
[Analyze grammar]

tāṃ prārthayantīṃ lalanālalāmaṃ |
asevitaśrīcaraṇairadṛṣṭām |
vatsāṃ manoruccapadaḥ svasāraṃ |
ko nānumanyeta budho'bhiyātām || 18 ||
[Analyze grammar]

ato bhajiṣye samayena sādhvīṃ |
yāvattejo bibhṛyād ātmano me |
ato dharmān pāramahaṃsyamukhyān |
śuklaproktān bahu manye'vihiṃsrān || 19 ||
[Analyze grammar]

yato'bhavadviśvamidaṃ vicitraṃ |
saṃsthāsyate yatra ca vāvatiṣṭhate |
prajāpatīnāṃ patireṣa mahyaṃ |
paraṃ pramāṇaṃ bhagavān anantaḥ || 20 ||
[Analyze grammar]

maitreya uvāca |
sa ugradhanvan iyadevābabhāṣe |
āsīcca tūṣṇīṃ aravindanābham |
dhiyopagṛhṇan smitaśobhitena |
mukhena ceto lulubhe devahūtyāḥ || 21 ||
[Analyze grammar]

so'nu jñātvā vyavasitaṃ mahiṣyā duhituḥ sphuṭam |
tasmai guṇagaṇāḍhyāya dadau tulyāṃ praharṣitaḥ || 22 ||
[Analyze grammar]

śatarūpā mahārājñī pāribarhān mahādhanān |
dampatyoḥ paryadāt prītyā bhūṣāvāsaḥ paricchadān || 23 ||
[Analyze grammar]

prattāṃ duhitaraṃ samrāṭ sadṛkṣāya gatavyathaḥ |
upaguhya ca bāhubhyāṃ autkaṇṭhyonmathitāśayaḥ || 24 ||
[Analyze grammar]

aśaknuvan tadvirahaṃ muñcan bāṣpakalāṃ muhuḥ |
āsiñcad amba vatseti netrodairduhituḥ śikhāḥ || 25 ||
[Analyze grammar]

āmantrya taṃ munivaraṃ anujñātaḥ sahānugaḥ |
pratasthe rathamāruhya sabhāryaḥ svapuraṃ nṛpaḥ || 26 ||
[Analyze grammar]

ubhayoḥ ṛṣikulyāyāḥ sarasvatyāḥ surodhasoḥ |
ṛṣīṇāṃ upaśāntānāṃ paśyan āśramasampadaḥ || 27 ||
[Analyze grammar]

taṃ āyāntaṃ abhipretya brahmāvartātprajāḥ patim |
gītasaṃstutivāditraiḥ pratyudīyuḥ praharṣitāḥ || 28 ||
[Analyze grammar]

barhiṣmatī nāma purī sarvasaṃpat samanvitā |
nyapatanyatra romāṇi yajñasyāṅgaṃ vidhunvataḥ || 29 ||
[Analyze grammar]

kuśāḥ kāśāsta evāsan śaśvaddharitavarcasaḥ |
ṛṣayo yaiḥ parābhāvya yajñaghnān yajñamījire || 30 ||
[Analyze grammar]

kuśakāśamayaṃ barhiḥ āstīrya bhagavān manuḥ |
ayajad yajñapuruṣaṃ labdhā sthānaṃ yato bhuvam || 31 ||
[Analyze grammar]

barhiṣmatīṃ nāma vibhuḥ yāṃ nirviśya samāvasat |
tasyāṃ praviṣṭo bhavanaṃ tāpatrayavināśanam || 32 ||
[Analyze grammar]

sabhāryaḥ saprajaḥ kāmān bubhuje'nyāvirodhataḥ |
saṅgīyamānasatkīrtiḥ sastrībhiḥ suragāyakaiḥ |
pratyūṣeṣvanubaddhena hṛdā śrṛṇvan hareḥ kathāḥ || 33 ||
[Analyze grammar]

niṣṇātaṃ yogamāyāsu muniṃ svāyambhuvaṃ manum |
yadābhraṃśayituṃ bhogā na śekurbhagavatparam || 34 ||
[Analyze grammar]

ayātayāmāḥ tasyāsan yāmāḥ svāntarayāpanāḥ |
śrṛṇvato dhyāyato viṣṇoḥ kurvato bruvataḥ kathāḥ || 35 ||
[Analyze grammar]

sa evaṃ svāntaraṃ ninye yugānāṃ ekasaptatim |
vāsudevaprasaṅgena paribhūtagatitrayaḥ || 36 ||
[Analyze grammar]

śārīrā mānasā divyā vaiyāse ye ca mānuṣāḥ |
bhautikāśca kathaṃ kleśā bādhante harisaṃśrayam || 37 ||
[Analyze grammar]

yaḥ pṛṣṭo munibhiḥ prāha dharmān nānāvidhān śubhān |
nṛṇāṃ varṇāśramāṇāṃ ca sarvabhūtahitaḥ sadā || 38 ||
[Analyze grammar]

etatte ādirājasya manoścaritamad‍bhutam |
varṇitaṃ varṇanīyasya tadapatyodayaṃ śrṛṇu || 39 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe dvāviṃśo'dhyāyaḥ || 22 ||
[Analyze grammar]