Chapter 16

[English text for this chapter is available]

brahmovāca |
iti tadgṛṇatāṃ teṣāṃ munīnāṃ yogadharmiṇām |
pratinandya jagādedaṃ vikuṇṭhanilayo vibhuḥ || 1 ||
[Analyze grammar]

śrībhagavānuvāca |
etau tau pārṣadau mahyaṃ jayo vijaya eva ca |
kadarthīkṛtya māṃ yadvo bahvakrātāmatikramam || 2 ||
[Analyze grammar]

yastvetayordhṛto daṇḍo bhavadbhirmāmanuvrataiḥ |
sa evānumato'smābhiḥ munayo devahelanāt || 3 ||
[Analyze grammar]

tadvaḥ prasādayāmyadya brahma daivaṃ paraṃ hi me |
taddhītyātmakṛtaṃ manye yatsvapumbhirasatkṛtāḥ || 4 ||
[Analyze grammar]

yannāmāni ca gṛhṇāti loko bhṛtye kṛtāgasi |
so'sādhuvādastat kīrtiṃ hanti tvacamivāmayaḥ || 5 ||
[Analyze grammar]

yasyāmṛtāmalayaśaḥśravaṇāvagāhaḥ |
sadyaḥ punāti jagadāśvapacādvikuṇṭhaḥ |
so'haṃ bhavad‍bhya upalabdhasutīrthakīrtiḥ |
chindyāṃ svabāhumapi vaḥ pratikūlavṛttim || 6 ||
[Analyze grammar]

yatsevayā caraṇapadmapavitrareṇuṃ |
sadyaḥ kṣatākhilamalaṃ pratilabdhaśīlam |
na śrīrviraktamapi māṃ vijahāti yasyāḥ |
prekṣālavārtha itare niyamān vahanti || 7 ||
[Analyze grammar]

nāhaṃ tathādmi yajamānahavirvitāneḥ |
cyotad‍ghṛtaplutamadan hutabhuṅmukhena |
yad‍brāhmaṇasya mukhataścarato'nughāsaṃ |
tuṣṭasya mayyavahitairnijakarmapākaiḥ || 8 ||
[Analyze grammar]

yeṣāṃ bibharmyahamakhaṇḍavikuṇṭhayoga |
māyāvibhūtiramalāṅghrirajaḥ kirīṭaiḥ |
viprāṃstu ko na viṣaheta yadarhaṇāmbhaḥ |
sadyaḥ punāti sahacandralalāmalokān || 9 ||
[Analyze grammar]

ye me tanūrdvijavarānduhatīrmadīyā |
bhūtānyalabdhaśaraṇāni ca bhedabuddhyā |
drakṣyantyaghakṣatadṛśo hyahimanyavastān |
gṛdhrā ruṣā mama kuṣantyadhidaṇḍanetuḥ || 10 ||
[Analyze grammar]

ye brāhmaṇānmayi dhiyā kṣipato'rcayantaḥ |
tuṣyaddhṛdaḥ smitasudhokṣitapadmavaktrāḥ |
vāṇyānurāgakalayātmajavad gṛṇantaḥ |
sambodhayanti ahamivāhamupāhṛtastaiḥ || 11 ||
[Analyze grammar]

tanme svabharturavasāyamalakṣamāṇau |
yuṣmadvyatikramagatiṃ pratipadya sadyaḥ |
bhūyo mamāntikamitāṃ tadanugraho me |
yatkalpatāmacirato bhṛtayorvivāsaḥ || 12 ||
[Analyze grammar]

brahmovāca |
atha tasyośatīṃ devīṃ ṛṣikulyāṃ sarasvatīm |
nāsvādya manyudaṣṭānāṃ teṣāṃ ātmāpyatṛpyata || 13 ||
[Analyze grammar]

satīṃ vyādāya śṛṇvanto laghvīṃ gurvarthagahvarām |
vigāhyāgādhagambhīrāṃ na vidustaccikīrṣitam || 14 ||
[Analyze grammar]

te yogamāyayārabdha pārameṣṭhyamahodayam |
procuḥ prāñjalayo viprāḥ prahṛṣṭāḥ kṣubhitatvacaḥ || 15 ||
[Analyze grammar]

ṛṣaya ūcuḥ |
na vayaṃ bhagavan vidmaḥ tava deva cikīrṣitam |
kṛto me'nugrahaśceti yadadhyakṣaḥ prabhāṣase || 16 ||
[Analyze grammar]

brahmaṇyasya paraṃ daivaṃ brāhmaṇāḥ kila te prabho |
viprāṇāṃ devadevānāṃ bhagavān ātmadaivatam || 17 ||
[Analyze grammar]

tvattaḥ sanātano dharmo rakṣyate tanubhistava |
dharmasya paramo guhyo nirvikāro bhavānmataḥ || 18 ||
[Analyze grammar]

taranti hyañjasā mṛtyuṃ nivṛttā yadanugrahāt |
yoginaḥ sa bhavān kiṃsvid anugṛhyeta yatparaiḥ || 19 ||
[Analyze grammar]

yaṃ vai vibhūtirupayātyanuvelamanyaiḥ |
arthārthibhiḥ svaśirasā dhṛtapādareṇuḥ |
dhanyārpitāṅghritulasīnavadāmadhāmno |
lokaṃ madhuvratapateriva kāmayānā || 20 ||
[Analyze grammar]

yastāṃ viviktacaritaiḥ anuvartamānāṃ |
nātyādriyatparamabhāgavataprasaṅgaḥ |
sa tvaṃ dvijānupathapuṇyarajaḥ punītaḥ |
śrīvatsalakṣma kimagā bhagabhājanastvam || 21 ||
[Analyze grammar]

dharmasya te bhagavatastriyuga tribhiḥ svaiḥ |
padbhiścarācaramidaṃ dvijadevatārtham |
nūnaṃ bhṛtaṃ tadabhighāti rajastamaśca |
sattvena no varadayā tanuvā nirasya || 22 ||
[Analyze grammar]

na tvaṃ dvijottamakulaṃ yadihātmagopaṃ |
goptā vṛṣaḥ svarhaṇena sasūnṛtena |
tarhyeva naṅkṣyati śivastava deva panthā |
loko'grahīṣyad ṛṣabhasya hi tatpramāṇam || 23 ||
[Analyze grammar]

tatte'nabhīṣṭamiva sattvanidhervidhitsoḥ |
kṣemaṃ janāya nijaśaktibhiruddhṛtāreḥ |
naitāvatā tryadhipaterbata viśvabhartuḥ |
tejaḥ kṣataṃ tvavanatasya sa te vinodaḥ || 24 ||
[Analyze grammar]

yaṃ vānayordamamadhīśa bhavānvidhatte |
vṛttiṃ nu vā tadanumanmahi nirvyalīkam |
asmāsu vā ya ucito dhriyatāṃ sa daṇḍo |
ye'nāgasau vayamayuṅkṣmahi kilbiṣeṇa || 25 ||
[Analyze grammar]

śrībhagavānuvāca |
etau suretaragatiṃ pratipadya sadyaḥ |
saṃrambhasambhṛtasamādhyanubaddhayogau |
bhūyaḥ sakāśamupayāsyata āśu yo vaḥ |
śāpo mayaiva nimitastadavaita viprāḥ || 26 ||
[Analyze grammar]

brahmovāca |
atha te munayo dṛṣṭvā nayanānandabhājanam |
vaikuṇṭhaṃ tadadhiṣṭhānaṃ vikuṇṭhaṃ ca svayaṃprabham || 27 ||
[Analyze grammar]

bhagavantaṃ parikramya praṇipatyānumānya ca |
pratijagmuḥ pramuditāḥ śaṃsanto vaiṣṇavīṃ śriyam || 28 ||
[Analyze grammar]

bhagavānanugāvāha yātaṃ mā bhaiṣṭamastu śam |
brahmatejaḥ samartho'pi hantuṃ necche mataṃ tu me || 29 ||
[Analyze grammar]

etatpuraiva nirdiṣṭaṃ ramayā kruddhayā yadā |
purāpavāritā dvāri viśantī mayyupārate || 30 ||
[Analyze grammar]

mayi saṃrambhayogena nistīrya brahmahelanam |
pratyeṣyataṃ nikāśaṃ me kālenālpīyasā punaḥ || 31 ||
[Analyze grammar]

dvāḥsthāvādiśya bhagavān vimānaśreṇibhūṣaṇam |
sarvātiśayayā lakṣmyā juṣṭaṃ svaṃ dhiṣṇyamāviśat || 32 ||
[Analyze grammar]

tau tu gīrvāṇaṛṣabhau dustarāt harilokataḥ |
hataśriyau brahmaśāpād abhūtāṃ vigatasmayau || 33 ||
[Analyze grammar]

tadā vikuṇṭhadhiṣaṇāt tayornipatamānayoḥ |
hāhākāro mahānāsīd vimānāgryeṣu putrakāḥ || 34 ||
[Analyze grammar]

tāveva hyadhunā prāptau pārṣadapravarau hareḥ |
diterjaṭharanirviṣṭaṃ kāśyapaṃ teja ulbaṇam || 35 ||
[Analyze grammar]

tayorasurayoradya tejasā yamayorhi vaḥ |
ākṣiptaṃ teja etarhi bhagavān tadvidhitsati || 36 ||
[Analyze grammar]

viśvasya yaḥ sthitilayod‍bhavaheturādyo |
yogeśvarairapi duratyayayogamāyaḥ |
kṣemaṃ vidhāsyati sa no bhagavāṃstryadhīśaḥ |
tatrāsmadīyavimṛśena kiyānihārthaḥ || 37 ||
[Analyze grammar]

iti śrīmadbhāgavate mahāpurāṇe pāramahaṃsyāṃ saṃhitāyāṃ |
tṛtīyaskandhe ṣoḍaśo'dhyāyaḥ || 16 ||
[Analyze grammar]