Bhagavad-gita with four Commentaries [sanskrit]
140,673 words | ISBN-10: 8189564072 | ISBN-13: 9788189564070
The Sanskrit edition of the Bhagavad Gita with four commentaries: (1) The Subodhini by Shridhara (Sridhara Swami), (2) The Gudharthadipika by Madhusudana (Saraswati), (3) The Sararthavarshini by Vishvanatha (Vishwanath Chakravarti) and (4) The Gitabhushana by Baladeva (Vidyabhushan). Original titles: Bhagavadgītā (भगवद्गीता), Śrīdhara (श्रीधर), Madhusūdana (मधुसूदन), Viśvanātha (विश्वनाथ), Baladeva (बलदेव)
Verse 10.41
yadyadvibhūtimatsattvaṃ śrīmadūrjitameva vā |
tattadevāvagaccha tvaṃ mama tejo'ṃśasaṃbhavam ||41||
The Subodhinī commentary by Śrīdhara
punaśca sākaṅkṣaṃ prati kathañcitsākalyena kathayati yadyaditi | vibhūtimadaiśvaryayuktam | śrīmatsampattiyuktam | ūrjitaṃ kenāpi prabhāvabalādinā guṇenātiśayitam | yadyatsattvaṃ vastumātraṃ bhavet, tattadeva mama tejasaḥ prabhāvasyāṃśena sambhūtaṃ jānīhi ||41||
The Gūḍhārthadīpikā commentary by Madhusūdana
anuktā api bhagavato vibhūtīḥ saṅgrahītumupalakṣaṇamidamucyate yadyaditi | yadyatsattvaṃ prāṇivibhūtimadaiśvaryayuktam, tathā śrīmatśrīrlakṣmīḥ sampat, śobhā, kāntirvā tayā yuktam | tayorjitaṃ balādyatiśayena yuktaṃ tattadeva mama tejasaḥ śakteraṃśena sambhūtaṃ tvamavagaccha jānīhi ||41||
The Sārārthavarṣiṇī commentary by Viśvanātha
anuktā api traikālikīrvibhūtīḥ saṅgrahītumāha yadyaditi | vibhūtimadaiśvaryayuktam | śrīmatsampattiyuktamūrjitaṃ balaprabhāvādyadhikaṃ sattvaṃ vastumātram ||41||
The Gītābhūṣaṇa commentary by Baladeva
anuktā vibhūtīḥ saṅgrahītumāha yadyaditi | vibhūtimadaiśvaryayuktam | śrīmatsaundaryeṇa sampattyā vā yuktamūrjitaṃ balena yuktaṃ vā yadyatsattvaṃ vastu bhavati, tattadeva mama tejo'ṃśena śaktileśena sambhavaṃ siddhamavagaccha pratīhīti svāyattatvasvavyāpyatvābhyāṃ sarve'bhedanirdeśā nītā vāmanādīnāṃ tannirdeśāstu saṅgamitāḥ santi ||41||
__________________________________________________________