Chapter 18

[English text for this chapter is available]

agniruvāca |
priyavratottānapādau manoḥ svāyambhuvātsutau |
ajījanatsa tāṃ kanyāṃ śatarūpāṃ taponvitām || 1 ||
[Analyze grammar]

kāmyāṃ kardamabhāryātaḥ samrāṭkukṣirvirāṭprabhuḥ |
surucyāmuttamo jajñe putra uttānapādataḥ || 2 ||
[Analyze grammar]

sunītyāntu dhruvaḥ putrastapastepe sa kīrtaye |
dhruvo varṣasahasrāṇi trīṇi divyāni he mune || 3 ||
[Analyze grammar]

tasmai prīto hariḥ prādānmunyagre sthānakaṃ sthiram |
ślokaṃ papāṭha hyuśanā vṛddhiṃ dṛṣṭvā sa tasya ca || 4 ||
[Analyze grammar]

aho'sya tapaso vīryamaho śrutamahodbhutam |
yamadya purataḥ kṛtvā dhruvaṃ saptarṣayaḥ sthitāḥ || 5 ||
[Analyze grammar]

tasmātśiṣṭiñca bhavyañca dhruvācchambhurvyajāyata |
śiṣṭerādhatta suchāyā pañca putrānakalmaṣān || 6 ||
[Analyze grammar]

ripuṃ ripuñjayaṃ ripraṃ vṛkalaṃ vṛkatejasam |
riporādhatta bṛhatī cākṣuṣaṃ sarvatejasam || 7 ||
[Analyze grammar]

ajījanatpuṣkariṇyāṃ vīriṇyāṃ cākṣuṣo manum |
manorajāyanta daśa naḍvalāyāṃ sutottamāḥ || 8 ||
[Analyze grammar]

ūruḥ pūruḥ śatadyumnastapasvī satyavākkaviḥ |
agniṣṭuratirātraśca sudyumnaścātimanyukaḥ || 9 ||
[Analyze grammar]

ūrorajanayatputrān ṣaḍagneyo mahāprabhān |
aṅgaṃ sumanasaṃ svātiṃ kratumaṅgirasaṅgayam || 10 ||
[Analyze grammar]

aṅgātsunīthāpatyaṃ vai veṇamekaṃ vyajāyata |
arakṣakaḥ pāparataḥ sa hato munibhiḥ kuśaiḥ || 11 ||
[Analyze grammar]

prajārthamṛṣayothāsya mamanthurdakṣiṇaṃ karaṃ |
veṇasya mathito pāṇau sambabhūva pṛthurnṛpaḥ || 12 ||
[Analyze grammar]

taṃ dṛṣṭvā munayaḥ prāhureṣa vai muditāḥ prajāḥ |
kariṣyati mahātejā yaśaśca prāpsyate mahat || 13 ||
[Analyze grammar]

sa dhanvī kavacī jātastejasā nirdahanniva |
pṛthurvaiṇyaḥ prajāḥ sarvā rarakṣa kṣetrapūrvajaḥ || 14 ||
[Analyze grammar]

rājasūyābhiṣiktānāmādyaḥ sa pṛthivīpatiḥ |
tasmāccaiva samutpannau nipuṇau sūtamāgadhau || 15 ||
[Analyze grammar]

tatstotrañcakraturvīrau rājābhūjjanarañjanāt |
dugdhā gaustena śasyārthaṃ prajānāṃ jīvanāya ca || 16 ||
[Analyze grammar]

saha devairmunigaṇairgandharvaiḥ sāpsarogaṇaiḥ |
pitṛbhirdānavaiḥ sarpairvīrudbhiḥ parvatairjanaiḥ || 17 ||
[Analyze grammar]

teṣu teṣu ca pātreṣu duhyamānā vasundharā |
prādādyathepsitaṃ kṣīrantena prāṇānadhārayat || 18 ||
[Analyze grammar]

pṛthoḥ putrau tu dharmajñau jajñāte'ntarddhipālitau |
śikhaṇḍinī havirdhānamantardhānātvyajāyata || 19 ||
[Analyze grammar]

havirdhānātṣaḍāgneyī dhiṣaṇājanayatsutān |
prācīnabarhiṣaṃ śukraṃ gayaṃ kṛṣṇaṃ vrajājinau || 20 ||
[Analyze grammar]

prācīnāgrāḥ kuśāstasya pṛthivyāṃ yajato yataḥ |
prācīnabarhirbhagavānmahānāsītprajāpatiḥ || 21 ||
[Analyze grammar]

savarṇādhatta sāmudrī daśa prācīnabarhiṣaḥ |
sarve pracetaso nāma dhanurvedasya pāragāḥ || 22 ||
[Analyze grammar]

apṛthagdharmacaraṇāste tapyanta mahattapaḥ |
daśavarṣasahasrāṇi samudrasalileśayāḥ || 23 ||
[Analyze grammar]

prajāpatitvaṃ samprāpya tuṣṭā viṣṇośca nirgatāḥ |
bhūḥ khaṃ vyāptaṃ hi tarubhistāṃstarūnadahaṃśca te || 24 ||
[Analyze grammar]

mukhajāgnimarudbhyāṃ ca dṛṣṭvā cātha drumakṣayam |
upagamyābravīdetān rājā somaḥ prajāpatīn || 25 ||
[Analyze grammar]

kopaṃ yacchata dāsyanti kanyāṃ vo māriṣāṃ varām |
tapasvino muneḥ kaṇḍoḥ pramlocāyāṃ mamaiva ca || 26 ||
[Analyze grammar]

bhaviṣyaṃ jānatā sṛṣṭā bhāryā vo'stu kulaṅkarī |
asyāmutpatsyate dakṣaḥ prajāḥ saṃvardhayiṣyati || 27 ||
[Analyze grammar]

pracetasastāṃ jagṛhurdakṣosyāñca tato'bhavat |
acarāṃśca carāṃścaiva dvipadotha catuṣpadaḥ || 28 ||
[Analyze grammar]

sa sṛṣṭvā manasā dakṣaḥ paścādasṛjata striyaḥ |
dadau sa daśa dharmāya kaśyapāya trayodaśa || 29 ||
[Analyze grammar]

saptāviṃśati somāya catastro'riṣṭanemine |
dve caiva bahuputrāya dve caivāṅgirase adāt || 30 ||
[Analyze grammar]

tāsu devāśca nāgādyā maithunānmanasā purā |
dharmasargampravakṣyāmi daśapatnīṣu dharmataḥ || 31 ||
[Analyze grammar]

viśvedevāstu viśvāyāḥ sādhyān sādhyā vyajāyata |
maruttvayā maruttvanto vasostu vasavo'bhavan || 32 ||
[Analyze grammar]

bhānostu bhānavaḥ putrā muhūrtāstu muhūrtajāḥ |
sambāyā dharmato ghoṣo nāgavīthī ca yāmijā || 33 ||
[Analyze grammar]

pṛthivīviṣayaṃ sarvamarundhatyāṃ vyajāyata |
saṅkalpāyāstu saṅkalpā indornakṣatrataḥ sutāḥ || 34 ||
[Analyze grammar]

āpo dhruvañca somañca dharaścaivānilonalaḥ |
pratyūṣaśca prabhāvaśca vasavoṣṭau ca nāmataḥ || 35 ||
[Analyze grammar]

āpasya putro vaitaṇḍyaḥ śramaḥ śānto munistathā |
dhruvasya kālo lokānto varcāḥ somasya vai sutaḥ || 36 ||
[Analyze grammar]

dharasya putro draviṇo hutahavyavahastathā |
manoharāyāḥ śiśiraḥ prāṇotha ramaṇastathā || 37 ||
[Analyze grammar]

purojavonilasyāsīdavijñāto'nalasya ca |
agniputraḥ kumāraśca śarastambe vyajāyata || 38 ||
[Analyze grammar]

tasya śākho viśākhaśca naigameyaśca pṛṣṭajaḥ |
kṛttikātaḥ kārttikeyo yatiḥ sanatkumārakaḥ || 39 ||
[Analyze grammar]

pratyūṣāddevalo jajñe viśvakarmā prabhāvataḥ |
kartā śilpasahasrāṇāṃ tridaśānāñca vardhakiḥ || 40 ||
[Analyze grammar]

manuṣyāścopjīvanti śilpaṃ vai bhūṣaṇādikaṃ |
surabhī kaśyapādrudrānekādaśa vijajñuṣī || 41 ||
[Analyze grammar]

mahādevaprasādena tapasā bhāvitā satī |
ajaikapādahirbraghnastvaṣṭā rudrāśca sattama || 42 ||
[Analyze grammar]

tvaṣṭuścaivātmajaḥ śrīmānviśvarūpo mahāyaśāḥ |
haraśca bahurūpaśca tryambakaścāparājitaḥ || 43 ||
[Analyze grammar]

vṛṣākapiśca śambhuśca kapardī raivatastathā |
mṛgavyādhasya sarpaśca kapālī daśa caikakaḥ |
rudrāṇāṃ ca śataṃ lakṣaṃ yairvyāptaṃ sacarācaraṃ || 44 ||
[Analyze grammar]